Yosh, yashil va yasha: farqi nimada?
Yosh so'zining ma'nosi, yashil so'zining ma'nosi, yasha so'zining ma'nosi, yasalishi va yashil so'zinig o'zagi haqida bilib oling.
< 1 min
20.10.2023
Tilshunoslik va filologiya

Yosh va yasha soʻzlarining bir oʻzakdan ekani sezilib turibdi. Yashil-chi? Mantiqan olganda uning ham qolgan ikki soʻz bilan ildizi bir. Yashillik — yashash, yasharish belgisi.

Tasavvurimiz ilmiy haqiqatga mos kelish-kelmasligini tekshirish uchun manbalarga murojaat qilamiz.

“Oʻzbek tilining etimologik lugʻati” ga koʻra, yosh va yasha soʻzlari qadimgi turkiy tildagi koʻp maʼnoli yash sifatidan hosil boʻlgan.

Yashning maʼnolaridan biri — bir yilga teng umrdir. Bugun yosh shaklida ishlatiladigan bu soʻz ayni shu maʼnoni ifodalaydi.

Yasha soʻzi esa yash sifatiga -a qoʻshimchasini qoʻshish orqali yasalgan.

Yashil soʻzi barg rangiga ega boʻl maʼnosidagi yash feʼliga -il qoʻshimchasini qoʻshib hosil qilingan.

Yashil soʻzi “Devonu lugʻatit-turk” da ayni shu shakl va maʼnoda kelgan. Mahmud Koshgʻariy toʻq yashil yap-yashil deyilishi, soʻz juft holda yashil-yushul deb qoʻllanishi mumkinligini aytadi.

Yap-yashil hozirgi tilda yam-yashilga oʻzgargan. Juft shakli esa ishlatilmaydi.


Maqola oriftolib.uz saytidan olindi. Original maqola → Yosh, yashil va yasha
Muqova surat: oriftolib.uz

Matnda xato topdingizmi? Kerakli matnni belgilang va CTRL+ENTER tugmalarini bosing.

Eng so‘nggi maqolalarni o‘tkazib yubormang!
Telegram kanalamizni kuzatib boring!