Kelajak geymerlari qanday ko‘rinishda bo‘ladi?
3 min
14.04.2023
Biologiya va tibbiyot

Tanishing, bu — Maykl — kelajak geymeri. Kanadalik tadqiqotchilar Maykl (Michael) ismli videooʻyinlarni sevuvchi geymerni loyihalashtirdi: u bukri va rangi oqarib ketgan. LADbible saytiga koʻra, bu grotesk model videooʻyinlar keragidan koʻp oʻynash odamlar koʻrinishiga qanday taʼsir oʻtkazishini tasvirlaydi.


Kanadalik olimlar tadqiqot oʻtkazdi va ishtiyoqli geymerlar oʻz odatlari va turmush tarzini oʻzgartirmasa, 20 yildan keyin qanday koʻrinishga kelib qolishini bashorat qildi. Mayklni loyihalash uchun tadqiqotchilar Kanada Milliy sogʻliqni saqlash xizmati, Jahon sogʻliqni saqlash tashkiloti va britaniyalik interaktiv koʻngilochar kompaniyalarning geymer turmush tarzining uning sogʻligʻiga taʼsiri haqidagi hisobotlarini koʻrib chiqdi. Ushbu maʼlumotga tayangan holda jamoa animator va rassomlar bilan ishladi.

Kelajak geymerlari qanday ko‘rinishda bo‘ladi?
techinsider.ru

Xoʻsh, bizda nimalar bor? Notoʻgʻri ovqatlanish (oʻz vaqtida ovqatlanmaslik) va quyosh nurining yetishmasligi D va B-12 vitaminlari yetishmasligiga olib kelgan, natijada Mayklning terisi oqarib ketgan. Maykl oʻyin oʻynaganda toʻgʻri oʻtirmagani tufayli beli bukilgan, bosh suyagi esa doimo quloqchin taqib yurgani sababli qiyshayib qolgan. Shuningdek, Maykl tez-tez stress holatiga tushishi tufayli (oʻyin oʻynaganda asabiylashish — tabiiy hol), u ekzema kasalligiga chalingan. Koʻzlar ekrandan deyarli uzilmagani va surunkali uyqusizlik tufayli modelning koʻzlari qizarib ketgan, ular ostida “xaltachalar” paydo boʻlgan.

Kelajak geymerlari qanday ko‘rinishda bo‘ladi?
techinsider.ru

Oyoqlar qonning yomon aylanishi va uzoq vaqt bir joyda oʻtirish sababli ishib ketgan. Qoʻllar esa sichqoncha va klaviaturani ushlayvergandan qadoq bosib ketgan. Qiyshaygan “Playstation-barmoq”ni ham koʻrishimiz mumkin — geympad(joystikni) sevuvchilarga alangali salom. Ha, aytgancha, qorin chiqqaniga oʻzingiz ham allaqachon eʼtibor berib boʻldingiz.


Tadqiqotchilar jonkuyar geymerlarga oʻz sogʻliklarini buzmaslikka yordam beruvchi 5 ta maslahat bilan ham oʻrtoqlashishdi va ularning barchasi juda oddiy:

  1. Jismoniy mashqlar. Muntazam mashqlar bajaring va ora-orada oʻrningizdan turib belingiz chigalini yozishni unutmang, bu boʻgʻinlarni yaxshi holatda saqlashga va semirishni yengishga yordam beradi.
  2. Koʻz zoʻriqishining oldini olish. Oʻyin oʻynayotgan xonangizda yorugʻlik yaxshiligiga amin boʻling, maʼlum bir vaqt oraligʻida koʻzlaringizni ekrandan uzoqroq tuting va koʻz uchun mashqlar bajaring.
  3. Sogʻlom ovqatlanish. Toʻyimli va sifatli ovqat isteʼmol qiling. Taomni toʻgʻri va oʻz vaqtida tanavvul qilish nafaqat sizni sogʻlom saqlashga yordam beradi, balki tanangiz yaxshi yoqilgʻi bilan taʼminlangan boʻlsa, oʻyin oʻynash samaradorligingiz ham oshadi.
  4. Toʻgʻri oʻtirish. Oʻzingizga toʻgʻri oʻtirishni va belingiz orqasida suyangich borligini eslatib turing. Yaxshi kresloga pul ayamang va monitoringiz koʻz darajasida ekaniga ishonch hosil qiling.
  5. Suv ichish. Koʻp-koʻp suv iching va gazlangan ichimliklar isteʼmolini maksimal darajada kamaytiring.

Eslatma: videooʻyinlarga qaramlik Jahon sogʻliqni saqlash tashkiloti tomonidan rasmiy psixologik kasallik sifatida tasniflanadi.
Manbalar: techinsider.ru, ladbible.com, who.int
Muqova surat: techinsider.ru

Matnda xato topdingizmi? Kerakli matnni belgilang va CTRL+ENTER tugmalarini bosing.

Eng so‘nggi maqolalarni o‘tkazib yubormang!
Telegram kanalamizni kuzatib boring!