Kayfiyatni ko‘taradigan yeguliklar
Taomlar, ularning insonga beradigan kayfiyati, kayfiyat ko'taradigan taomlar, kartoshkaing va sitrus mevalarning organizmga foydalari haqida o'qing.
3 min
15.02.2023
Biologiya va tibbiyot

“Ovqating dori, doring ovqat boʻlsin”, deydi donolar. Yeguliklar tanimizga kuch berish, shifo boʻlishdan tashqari kayfiyatga taʼsir etish xususiyatiga ham ega. Mutaxassislar inson kayfiyatini koʻtaradigan taomlar roʻyxatini tuzib chiqdi. Ularni tanovul qilganingizdan soʻng, 15–20 daqiqa oʻtgach, rohat va shodlik hissini tuyasiz.


Yeguliklarimiz tarkibida deyarli doim hoziru nozir boʻladigan sabzavot bu kartoshkadir. Uni sevadiganlar koʻp, hatto milliy taomimiz palovga ham soladiganlar topiladi (shunaqasiyam boʻlarkanmi?). Kartoshkadan tayyorlangan taomlar organizmda serotonin moddasi ishlab chiqarilishiga sabab boʻladi. Bu modda odamga xush kayfiyat va baxt hissini beradi.

matthiasboeckel / pixabay.com

Yashil bargli sabzavotlar vujudimizda foli kislotasi — M vitamini paydo boʻlishiga hissa qoʻshadi. Olimlar fikricha, bu kislota yetishmasligi odamda siqilish va xavotir tuygʻusini uygʻotadi. M vitamini karam, salat bargi va koʻkatlarda koʻp.

ulleo / pixabay.com

Yogʻli aminokislotalarga ega mahsulotlar ham kayfiyatni koʻtarishga munosib hissa qoʻshadi. Yongʻoq, bodom, baliq va turli oʻsimlik moylari ana shunday mahsulotlar sirasiga kiradi.

LubosHouska / pixabay.com

Bu borada sitrus mevalar ham juda foydali. Mandarin, apelsin kabi mevalar miyaga xursandchilik gormonlari ishlab chiqarishda koʻmaklashadi. Vujudimizni B, C vitaminlari va asab tizimini mustahkamlovchi mikroelementlar bilan boyitadi. Lekin meʼyorni bilish shart. Aks holda, xush kayfiyat oʻrniga yuzingizga qizil dogʻlar toshishi, turli allergik toshmalar paydo boʻlishi mumkin.

ponce_photography / pixabay.com

Hayratlanarlisi, achchiq yeguliklar ham endorfinlar darajasini oshiradi. Ovqatga qalampir qoʻshib yeyish kishida yengil kayfiyat uygʻotadi. Albatta, bunda ham qachon toʻxtashni bilish zarur.

NoName_13 / pixabay.com

Toʻgʻri, ayrim meva-sabzavotlarni sotib olishning doim ham iloji yoʻq. Lekin pishiqchilik mavsumida imkoniyatdan foydalanib qolish kerak. Masalan, qulupnay aprel-may oylaridagina hosil beradi xolos. Bu meva tarkibida B, C, E vitaminlari, magniy va kalsiy minerallari bor. Sanalganlarning barchasi asab impulslarini kuchaytiradi va endorfin hosil boʻlishiga koʻmaklashadi. Bundan tashqari, qulupnayning yorqin rangi ham yaxshi kayfiyat bagʻishlaydi.

Shodlik va baxt hissini berishda ovqat birlamchi emas. Bu tuygʻularga ijtimoiy faoliyat, yon-atrofdagilar bilan munosabat, hissiy-ruhiy holat, salomatlik katta taʼsir koʻrsatadi. Hayotini toʻgʻri yoʻlga qoʻygan kishi ovqatlanishni ham tartibga sola bilsa, faqatgina ijobiy natijalarga erishadi.


Maqola oriftolib.uz saytidan olindi. Original maqola → Kayfiyatni koʻtaradigan yeguliklar.
Muqova surat: Olichel / pixabay.com

Matnda xato topdingizmi? Kerakli matnni belgilang va CTRL+ENTER tugmalarini bosing.

Top maqolalar

Barchasi
Eng so‘nggi maqolalarni o‘tkazib yubormang!
Telegram kanalamizni kuzatib boring!