Van Gogning yashirin avtoportreti topildi
Vinsent Van Gogning noma'lum portreti Shotlandiya Milliy galereyasida topildi. Avtoportret rassom hayoti haqida o'rganishda yordam berishi mumkin.
Oʻrta
2 min
20.12.2022
Tarix

Edinburgda joylashgan Shotlandiya Milliy galereyasi restavrator xodimlari Vinsent Van Gogning “Dehqon ayolning boshi” suratining orqa tomoniga yashirilgan va avval nomaʼlum boʻlgan avtoportretini topdi. Bu yangi surat buyuk rassom hayotini oydinlashtirishga yordam berishi mumkin. Bu haqda galereyaning matbuot xizmatida xabar berildi.

Taʼkidlash joizki, tadqiqotchi va restavratorlar tomonidan buyuk rassomlar asari orqasidan yashirin suratlar topilishi noyob hodisa emas. Fransuz rassomi Andre Derenning “Shanba” yoki Kazimir Malevichning “Qora kvadrat” asarlari bilan ham shunday holat kuzatilgan edi. Bunday holatlarni aniqlashga rentgen va infraqizil nurlar, shuningdek, surat namunalarini mikroskop ostida tekshirish kabi turli fizik metodlar yordam beradi.

Edinburgdagi Shotlandiya Milliy galereyasi xodimlari topgan Vinsent Van Gogning avtoportreti deb taxmin qilinayotgan surat ham shunday kashfiyot boʻldi. Unda soyaboni keng shlyapali, boʻyniga yengil oʻralgan roʻmoli bor soqolli erkak tasvirlangan. Mazkur surat restavratorlarning boʻlajak koʻrgazma oldidan Van Gogning 1885-yilgi “Dehqon ayolning boshi” suratini rentgen nurlari bilan tekshirish jarayonida topilgan. Avtoportret xolstning orqa qismida, yelim va karton ostida yashirilgan holatda boʻlgan.

Mutaxassislarning fikricha, ushbu yashirilgan surat Van Gogning Parijga koʻchib oʻtganidan soʻng fransuz impressionistlari ishlari bilan tanishganidan keyingi faoliyatidagi muhim vaqtda yaratilgan. Oʻsha davrlarda rassom pulni tejash uchun xolstlarni aylantirib, har ikki tomoniga ham rasm chizgan. Oʻlimidan soʻng “Dehqon ayolning boshi” surati ancha mukammalroq deb hisoblanib, orqadagi avtoportret karton bilan yashirib qoʻyilgan. 


Ushbu maqola nplus1.ru sayti materialining tarjimasi.
Muqova surat: Van Gog avtoportreti / Shotlandiya Milliy galereyasi

Matnda xato topdingizmi? Kerakli matnni belgilang va CTRL+ENTER tugmalarini bosing.

Top maqolalar

Barchasi
Eng so‘nggi maqolalarni o‘tkazib yubormang!
Telegram kanalamizni kuzatib boring!