Dengiz filini kurakoyoqlilarning toʻrtinchi turi deb hisoblash mumkin edi, lekin aslida ular ulkan tyulenlardir. Bu ulkan fil tyulenlar yoki shunchaki dengiz fillarining ikkita turi mavjud. Birinchisi, Antarktika suvida yashaydigan Janubiy dengiz fillari. Ikkinchisi, Janubiy Kaliforniya qirgʻoqlari yaqinidagi suvlarda yashab, Gvadelupa va boshqa kichik orollarda koʻpayadigan Shimoliy dengiz fillari. Ikkala tur ham bir-biriga juda oʻxshash va taxminan bir xil oʻlchamlarga ega.

Voyaga yetgan yirik erkaklarining uzunligi deyarli olti metr, ogʻirligi esa uch tonnadan oshishi mumkin. Urgʻochilar odatda ancha kichikroq boʻlib, uzunligi ikki—uch metrdan oshmaydi. Urchish davridan taxminan ellik hafta oʻtgach, ularning vazni 40–45 kilogramm boʻlgan yagona bolasi dunyoga keladi. Dengiz fillarining ulkan erkaklari xartumga oʻxshash osilgan uzun burunga ega. Xavf tugʻilganda, erkagi xartumini yuqoriga koʻtarib, dahshatli oʻkiradi.

1890-yilga kelib, ularning terisi va yogʻi uchun olib borilgan vahshiylarcha ov oqibatida shimoliy dengiz fillari deyarli yoʻq boʻlib ketish arafasida qolgan. Ammo Meksika hukumati ularning janubiy qarindoshlarini himoya ostiga olgan va endi ular soni asta-sekin koʻpayib bormoqda. Har yili ular toʻplanadigan joylarda 8 000 dan 10 000 gacha boʻlgan ulkan hayvonlarni koʻrish mumkin.