Ehtimol, biron kishini AQShning besh sentlik chaqasidagi bizon aslida bizon emasligiga ishontirish qiyin boʻlsa kerak. Biroq bu haqiqat. Amerika bizoni deb ataladigan jonivor umuman bizon emas, balki zubrdir. U yovvoyi buqalar oilasiga tegishli va haqiqiy bizon bilan shunchalik yaqin qarindoshki, bir-biriga mutanosib boʻlib, ​​ qovurgʻalari 14 juftligi bilan ham juda oʻxshashdir.

Amerika zubri ulkan yelka, bosh va tanasining old qismini qoplab turadigan paxmoq junga ega. Bosh va old qismi bilan taqqoslaganda, tananing qolgan qismi deyarli yalangʻoch kabi koʻrinadi. Buqalari odatda urgʻochilariga qaraganda ancha yirik. Buqaning vazni 900 kilogrammgacha boʻlishi mumkin. Hindular uchun Amerika zubri ovqat, kiyim-kechak va boshpanadir.

Bizon hindularga nafaqat barra, balki quritilgan holda ham isteʼmol qiladigan aʼlo sifatli goʻshtni beradi. Terisidan qishki kiyimlar, tipi, ot jabduqlari, qalqon va qayiq qoplamalari tayyorlanadi. Hatto suyak, pay va shoxlari ham ishlatiladi. Bizon 20 yildan ozroq vaqt davom etgan qirgʻin natijasida butunlay yoʻqolib ketishdan zoʻrgʻa omon qolgan. Bir paytlar Allegan va Qoyali togʻlar orasidagi hududlarda bizonlarning ulkan podalari yashagan. Ammo 1800-yilga kelib, Missisipidan sharqqa tomon bizon deyarli qolmagan. Gʻarbning tekisliklarida esa hali ham minglab, hatto millionlab bizonlar oʻtlab yurgan. Bu podalarning kattaligi aql bovar qilmas darajada yirik edi. Ular preriyalarni ufqqa qadar qoplagan. Daryolardagi kemalar vaqti-vaqti bilan bir qirgʻoqdan ikkinchisiga oʻtayotgan bizonlar tufayli toʻxtab turgan, poezdlar esa bu hayvonlarning katta qoʻshinlari temiryoʻl orqali oʻtgunga qadar soatlab kutishga majbur boʻlgan. Yangi temiryoʻllarning minglab quruvchilarini boqish uchun ovchilar tomonidan butun boshli podalar yoʻq qilingan hamda yuz minglab bizonlar faqatgina terisi uchun oʻldirilgan.

1865-yildan 1875-yilgacha har yili taxminan 2 000 000 ta bizon terisining har biri 1 dollardan sotilgan. 1889-yilga kelib, butun Shimoliy Amerikada atigi 835 ta bizon qolgan va ulardan 256 tasi tutqunlikda boʻlgan. Hozirgi vaqtda AQSh va Kanadada taxminan 15 000 ta bizon yashaydi.