Inson tanasida oʻrtacha olti litrdan koʻproq qon bor. Bu qon har xil turdagi hujayralarni oʻz ichiga olgan suyuqlikdan iborat. Ushbu suyuqlik plazma deb ataladi. Qon hajmining taxminan 55 foizini plazma tashkil qiladi. Bu shaffof, biroz sargʻish suyuqlik. Ovqatlangandan soʻng unda mayda yogʻ pufaklari eriydi va u ozroq xiralashadi. Shuning uchun ham qon tahlilidan oldin ovqatlanmaslik soʻraladi. Tanangizdagi plazma hayotiy zarur moddalarni harakatga keltiradigan daryoga oʻxshaydi. U hazm boʻlgan ovqatdagi moddalarni kichik ichak devorlaridan tana toʻqimalariga oʻtkazadi. Shuningdek, u chiqindilarni toʻqimalardan buyrakka olib boradi.

Ammo bu plazma bajaradigan ishlarning faqat bir qismidir. Unda kasalliklarga qarshi immunitet beradigan antitanachalar va tanadagi turli jarayonlarni tartibga soluvchi gormonlar mavjud. Bundan tashqari, u chiqindi karbonat angidridning katta qismini toʻqimalardan oʻpkaga qaytaradi. Koʻrib turganingizdek, plazmada aslida bir necha yuz xil moddalar mavjud. Bu moddalarga qoʻshimcha ravishda plazma 91 foiz suv, 7 foiz oqsil va 0,9 foiz mineral tuzlardan iborat. Tuzlar va oqsil toʻqimalar qondagi kerakli suv muvozanatini saqlash uchun zarurdir. Plazmadagi mineral tuzlar tanadagi boshqa hayotiy funksiyalarni ham bajaradi. Plazma ularni biz isteʼmol qiladigan ovqatdan oladi.