Sentabrdan noyabrgacha har shanba kuni, tush vaqti — AQShda amerikancha futbol vaqti. Mamlakat boʻylab minglab stadionlarda millionlab odamlar maktab oʻquvchilari yoki kollej talabalarining oʻyinini tomosha qilish uchun yigʻiladi. Darhaqiqat, garchi bu oʻyinning yoshi 100 dan sal oshgan boʻlsa ham, amerikancha futbol butun mamlakat kollejlarida yetakchi sport turi hisoblanadi. AQShdagi birinchi amerikancha futbol oʻyini 1869-yil 6-noyabrda Nyu-Jersi shtatidagi Nyu-Bransuikda Prinston va Rudjers universitetlari jamoasi oʻrtasida boʻlib oʻtgan.

Oʻyin dastlab Yel, Garvard, Kolumbiya kabi yoshi ulugʻ sharq universitetlari orasida tarqalib, keyinchalik butun xalq tomonidan qabul qilingan. Qizigʻi, futbol oʻyini Sparta va Rim davridan beri mavjud boʻlgan. Bu turdagi futbol askarlarni jangovar harakatlarga mashq qildirish uchun oʻynalgan. Rimliklar tomonidan Angliyaning zabt etilishi bilan bu oʻyin u yerga ham kelgan.

U asta-sekin rivojlangan. XI asrga kelib esa Britaniyada bunday tepib oʻynaladigan oʻyin shu qadar ommalashib ketganki, bu oʻyinchilarning koʻp vaqtini olib, otish mahoratini oshirishga zarar yetkazgani sabab qirol Richard II sportning bu turini taqiqlagan. Hozirda oʻynaladigan amerikancha futbol 1823-yilning bir kunida tasodifan oʻylab topilgan. Bu vaqtga kelib, Angliyada toʻp tepib oʻynaladigan oʻyin hozirgi futbol oʻyiniga oʻxshagan. Yuqorida aytilgan kuni jamoaning oʻyinchilaridan biri, regbilik talaba Uilyam Uebb Ellis ham faol qatnashgan. Oʻyin oʻrtalarida qoidalar talab qilganidek toʻpni tepish oʻrniga, u toʻpni ushlab olib, maydon boʻylab yugurgan. Ushbu qoidabuzarlik Ellisni jiddiy tanqid ostida qoldirgan, uning jamoasi sardori esa raqib jamoa sardoridan kechirim soʻrashga majbur boʻlgan. Ammo bu noqonuniy harakat zamonaviy amerikancha futbolning tugʻilishiga sababchi boʻlgan. Anʼanaviy oʻyin oddiy futbolga aylangan. Ellisning oʻyin varianti ingliz regbi oʻyiniga aylandi. AQShda esa regbining bir turi amerikancha futbol deb ataladi.