Qartalar bilan bogʻliq barcha narsalar singari brij oʻyini ham qadimiy tarixga ega. U vist (qarta oʻyinining bir turi) turkumiga tegishli. Vistda boʻlgani kabi barcha oʻyinlarda toʻrt kishi, ikkitaga ikkita boʻlib oʻynaydi. 52 ta qartadan iborat dasta har bir oʻyinchiga 13 tadan tushadigan tarzda tarqatiladi. Oʻyinning maqsadi — har bir yurishdagi qartalarni olish. Har bir yurish har bir oʻyinchi tomonidan bittadan tashlangan qartalardan iborat. Vistning Angliyada paydo boʻlganini hamma tan olgan. Vist oilasining “Triumf”dan boshlangan, keyinchalik “Kuzirlar”, “Kuzir va onerlar (yoki dubulgʻa)”, visk (yoki vist), brij, brij “Auksion” (vist kabi) va nihoyat, brij-kontraktdan iborat bir qator oʻyinlari mavjud boʻlgan. Bu oʻyinlarning dastlabkilari 400 yildan koʻproq vaqt oldin nashr etilgan ingliz kitoblarida tilga olingan. Vist dastlab quyi sinflarning oʻyini boʻlgan. XVIII asrning boshida uni London qahvaxonalaridagi janoblar ham oʻzlashtirgan.

1742-yilda Edmond Xoyl “Vist boʻyicha qisqacha qoʻllanma”ni nashr etgan. Shundan soʻng o‘yin juda ommabop boʻlib, Yevropa va Amerikada keng tarqalgan. Vist qanday qilib brijga aylangani unchalik aniq emas. Baʼzilarning taʼkidlashicha, brij Rossiyadan, rus tilidagi “berech” (asrash) dan kelib chiqqan. Boshqalar brijning vatani Daniya deb hisoblaydi. Yana bir nazariyaga koʻra, u Turkiyadan kelib chiqqan va Turkiya, Misrdagi maʼlum bir ishqibozlik bilan bogʻliq. Turkiya brij oʻyini juda mashhur boʻlgan birinchi mamlakat boʻlganligi aytiladi. “Brij” soʻzi turkcha “bir-uch” soʻzidan kelib chiqqan boʻlishi ham mumkin.

1907-yildan 1930-yilgacha brij “Auksion” shu qadar mashhur boʻlganki, uni butun dunyo boʻylab kamida 15 000 000 kishi oʻynagan. Bugungi kunda uning oʻrnini yanada mashhurroq boʻlgan brij-kontrakt egallagan.