Bu savolga javob “halokatli” soʻzi bilan nima nazarda tutilganiga bogʻliq. Bu bilan boshqa ilonlarga qaraganda koʻproq odam oʻldirgan ilon nazarda tutilganmi yoki eng kuchli zaharga ega boʻlgan ilonmi? Baʼzi olimlar qirol kobrasini eng halokatli ilon deb hisoblaydi. Ular oʻz fikrini quyidagi sabablar bilan asoslaydi. Uning zahari juda xavflidir. Bu ilon sustkashliksiz darhol hujum qiladi. Qirol kobrasi chaqishi natijasida odam bir soat ichida vafot etgan holatlar ham maʼlum.

Qirol kobrasi bilan Avstraliyada uchraydigan yoʻlbarsilon raqobatlashishi mumkin. Uning zahri eng kuchlilardan biridir, ammo, xayriyatki, yoʻlbars ilon cheklangan miqdordagi zaharga ega. Yana bir “rekordchi” ilon Hindistonda yashaydi. U krayt deb ataladi va bu ilon chaqqan odamlarning 77 foizi vafot etadi.

Yana bir hind kobrasi — koʻzoynakli kobra, ehtimol, boshqa ilonlarga qaraganda koʻproq odamlarni oʻldirgandir, lekin tibbiy yordam oʻz vaqtida koʻrsatilsa, qurbonlarning atigi 10 foizi halok boʻladi.

Aytgancha, dunyodagi eng katta ilon sira ham eng halokatli hisoblanmaydi. Gap Janubiy Amerikada uchraydigan anakonda haqida. Bu ilonning uzunligi toʻqqiz metrga yetishi mumkin. Ammo anakondalar borish qiyin boʻlgan joylarda yashagani tufayli tadqiqotchilar hali uchratmagan, kattaroq oʻlchamdagilari ham boʻlishi mumkin.