Akulaning 150 dan ortiq turi mavjud. Bitta turdan tashqari qolgan barchasi dengiz suvida yashaydi. Markaziy Amerikada chuchuk suv akulasi yashaydigan Nikaragua koʻli mavjud. Akula bir joyda yashamaydi, balki oʻlja qidirib yuzlab kilometrni suzib oʻtadi. Aksariyat yirik akulalarni asosan ochiq dengizda, suv yuzasiga yaqin joyda uchratish mumkin. Ammo okean qaʼrida, juda chuqurda yashaydiganlari ham bor. Kichikroq akulalar odatda qirgʻoqlar yaqinida yashaydi va ularni koʻpchilik issiq, moʻtadil iqlimli dengizlarda uchratishi mumkin. Koʻpchilik akulalarni juda xavfli deb biladi.

Aslida xavfli boʻlgan akulalar ham, bezararlari ham bor. Masalan, koʻpincha kemalarga ergashadigan akulalar bezarar “axlatchilar” boʻlib, kemalardan tashlangan oziq-ovqat qoldiqlarini terib yuradi. Bu akulalardan hatto kichik baliqlar ham qoʻrqmaydi. Agar ularga hujum qilinmasa, baʼzi juda katta akulalar ham xuddi shunday xavfli emas. Bunday akulalardan biri — kit akulasi. Uni Oʻrta dengiz, Tinch okeani va Florida yaqinidagi Karib dengizida uchratish mumkin. Uning uzunligi baʼzan 11 metrdan oshadi va ogʻirligi 13 tonnani tashkil qiladi.

Gigant akula — xavfsiz katta akulalarning yana biri. U Shimoliy Atlantikadagi eng katta baliq boʻlib, uzunligi 13 metrdan oshadi. U orqasini suvdan chiqarib, quyoshda toblanishni yoqtiradi. Ammo barcha baliqlarning eng dahshatlisi uzunligi baʼzan 12 metrga yetadigan, ulkan oq akuladir. U odamlarga, albatta, hujum qiladi.