Ularning odatdagi nomi — “uchar likopchalar”. NUJ “nomaʼlum uchuvchi jism” degan maʼnoni anglatadi (ruschada НЛО — Неопознанный летающий объект; inglizchada esa UFO — Unidentified Flying Object). Ular haqiqatan ham mavjudmi? Bu haqida koʻplab kitoblar yozilgan, minglab insonlar esa ularni koʻrganini taʼkidlaydi. Baʼzilari hatto ularni suratga olishga ulgurganini tasdiqlaydi. Ilmiy tadqiqotlarga qaramay, NUJ borligiga ishonadigan odamlar hamisha topiladi. Uchar likopchalar haqidagi xabarlarni oʻrganish NUJ bir-biridan juda farq qilishini koʻrsatdi. Baʼzilar tekis shakldagi, boshqalari esa shar, choʻzinchoq yoki kulcha shaklidagi likopchalarni koʻrganini xabar qilgan. Likopchalarning rangi ularning shakli kabi xilma-xil koʻrinadi, negaki deyarli barcha rangdagi likopchalar haqida xabarlar maʼlum. Baʼzilari ularni kuzatib turish jarayonida rangini ham oʻzgartirgan.

Odamlar likopchalar turli tezlikda va barcha yoʻnalishlarda — burchak ostida, vertikal ravishda yuqoriga va pastga yoki zigzag boʻlib harakatlanayotganini koʻrishgan. Ular havoda harakatsiz muallaq turib qolishi, hushtaksimon yoki guvullagan ovoz chiqarishi mumkin. АQSh harbiy-havo kuchlari uchar likopchalar haqidagi xabarlarni oʻrgana boshlaganda odamlar hech narsani oʻylab topmaganini aniqladi. Uchar likopchalar haqida xabar berganlarning bari haqiqatan ham nimanidir koʻrgan. Lekin nimani?

Baʼzi hollarda “biror narsa” zond yoki sunʼiy yoʻldosh, bulut, kometa, meteorit, yulduz, qush, sayyora yoki feyerverk boʻlib chiqar edi. Ular orasida quyoshning muz kristallaridagi aksi ham bor edi.

Uchar likopchalar haqidagi tasavvurlarga “sharsimon yashin” sabab boʻlgan. Аgar likopchalar haqiqatan ham kosmik kemalar boʻlsa, ular haqidagi barcha hikoyalarda umumiy jihat boʻlar edi. Lekin bunday narsa yoʻq. Buning sababi shundaki, insonlar kosmik kemalarni emas, balki boshqa jismlarni koʻrishgan. Shuning uchun olimlar oʻzga olamlarning aqlli mavjudotlari sayyoramizga kelishi, bizni zimdan kuzatishi yoki bosib olishi haqida hech qanday dalil yoʻq deb hisoblashadi.

Keyingi safar doʻstingiz uchar likopchani koʻrganini aytsa, ushbu maqolani oʻqishni tavsiya qiling. 🛸