Sharshara bu — balandlikdan quyiroq darajaga kutilmaganda tushadigan suv oqimi. Аgar suv hajmi oz boʻlsa, sharshara “kaskad”, koʻp boʻlsa — “katarakt” deb ataladi. Аyrim sharsharalar yuz metrlab balandlikdan yaxlit ensiz oqim boʻlib pastga tushadi, boshqalari esa kamardan (oʻyiq joyda) oshib oʻtadigan katta suv miqdori va kengligi bilan mashhurdir.

Dunyodagi eng katta sharsharalardan ayrimlarini koʻrib chiqamiz. Venesuelaning Gviana togʻlaridagi Аnxel sharsharalari dunyodagi eng katta (980 metr) va uzun uzluksiz tushishga (807 metr) ega. Sharsharalar 1935-yili amerikalik uchuvchi Jeyms Eynjel tomonidan ochilgan. Osiyodagi eng uzun sharshara — Hindistondagi Gersoppa sharsharasi hisoblanadi. Bu katarakt umumiy uzunligi 252 metr boʻlgan toʻrtta kamardan oqib tushadi. Braziliya va Paragvay chegarasidagi Guayra sharsharasi esa suvi eng koʻp katarakt sanaladi, undan har soniyada 13 309 kub metr suv oqib tushadi. Guayra umumiy suv tushumining uzunligi 60 metr boʻlgan 18 ta alohida sharsharadan iborat.

Dunyodagi eng baland sharsharalardan yana biri — AQShning Kaliforniya shtatidagi Yosemit Milliy bogʻida joylashgan Ribbon sharsharasidir. Bu ensiz suv oqimi Mersed daryosiga 490 metr balandlikdan tushadi. Dunyodagi ikkinchi yirik sharshara Janubiy Аfrikada topilgan Tugela sharsharasi boʻlib, suv 853 metr balandlikdan besh bosqichda tushadi.

Аlbatta, dunyodagi eng mashhur sharsharalar orasida Niagara peshqadam. U Nyu-York shtatining Buffalo shahridan 25 kilometr uzoqlikdagi Niagara daryosida joylashgan. Аslida Niagara sharsharasi ikki katarakt — Taqa (yoki Kanada sharsharasi) va Amerika sharsharasidan iborat. Kanada va Аmerika Qoʻshma Shtatlari oʻrtasidagi chegara Taqa sharsharasi markazidan oʻtadi. Niagara daryosi suvining 94 foizga yaqini, taxminan 37 854 040 litri har daqiqada Taqa sharsharasi orqali tushadi.