Revmokardit — odatda faqat yoshlarda uchraydigan yurak kasalligi. Afsuski, bu kasallik yurakning jiddiy va davolab boʻlmaydigan buzilishlariga olib kelishi mumkin, shuning uchun bu kasallikka chalingan kishi ehtiyot boʻlishi kerak. Ammo u faol hayot kechirishda davom eta oladi. Katta ehtimol bilan, yuqtirib olingan ayrim bakteriyalar revmokarditga sabab boʻladi. Bu xuddi kasallangan odamning muayyan bakteriyalarga allergiyasi bordek tuyuladi. Shuningdek, bu irsiyat natijasi ham boʻlishi mumkin. Odamning yoshi ham bu kasallik uchun katta ahamiyat kasb etadigandek.

Bu kasallikka koʻpincha 6 yoshdan 19 yoshgacha boʻlganlar chalinadi. Undan kichik yoki katta boʻlganlarning bu kasallikka chalinish ehtimoli kamroq. Deyarli barcha revmokardit holatlari streptokokklar deb ataladigan bakteriyalar bilan bogʻliqqa oʻxshaydi. Shuning uchun tomoqning streptokokkli va burun-halqum infeksiyalari, tonzillit va qizilchadan keyin bu kasallikning paydo boʻlishi ehtimoli katta. Bundan revmokarditni shifokor nazorati ostida davolashning muhimligi kelib chiqadi.

Koʻpincha revmokarditning alomatlari shunchalik ahamiyatsizki, odam ularga mutlaqo eʼtibor bermaydi. Ammo shifokor kasallikni oʻz vaqtida aniqlay oladi va uning aralashuvi kasallikning jiddiy rivojlanishiga barham beradi. Bola oʻsayotgani uchun paydo boʻladi deb hisoblanadigan ogʻriqlar kuzatilganda, bu revmokarditning yengil hurujlari boʻlishi mumkin va darhol shifokorga murojaat qilish kerak.

Revmokardit bilan bogʻliq ogʻriqlar odatda boʻgʻimlarda, ayniqsa, tizza va tirsaklarda paydo boʻladi. Uning oʻtkir holatlarida harorat sezilarli darajada ko‘tarilishi mumkin. Bunda boʻgʻimlar shishadi, qizarib ketadi, zaiflashadi va juda ogʻriydi. Baʼzida teri ostida shish paydo boʻladi va bu holat koʻpincha kasallikning jiddiyligini koʻrsatadi. Bu kasallikni davolash doimiy tibbiy yordamni talab qiladi.