Hukumat haqida soʻz ketganda, odatda parlamentning quyi palatasida oʻtirgan siyosiy arboblar nazarda tutiladi. Ularning ayrimlari turli davlat idoralariga rahbarlik qiladi. Biroq bu davlat arboblarining orqasida ularsiz mamlakatning barcha maʼmuriy tuzilmalari faoliyati behuda boʻladigan fuqarolarning butun boshli armiyasi turibdi. Uayt Xoll va mamlakatning boshqa barcha muassasalaridagi turli lavozimlardagi amaldorlar hukumat mashinasining bir qismidir.

Qadimda askarlar hukumat xizmatidagi deyarli yagona odamlar boʻlgan. Koʻpincha hukumat monarxning oʻzi boʻlib, u jamiyatning imtiyozli qatlamlaridan boʻlgan cheklangan doiradagi shaxslarga maʼlum bir hokimiyat bergan. Vaqt oʻtgan sari hukumatda ishlaydiganlar soni koʻpayib borgan. Maxsus tayyorlangan odamlargina bajara oladigan yangi ish turlari paydo boʻlgan.

Harbiy sohada boʻlmagan hukumat amaldorlari davlat fuqarolik xizmatchilari deb nomlana boshlangan. Davlat muassasalariga ishga qabul tanlov imtihonidan soʻng amalga oshiriladi. Boʻsh joylar toʻgʻrisidagi maʼlumotlar muntazam ravishda umumdavlat va mahalliy gazetalarda chop etiladi.

Pochtachilar, Milliy Galereya va bojxona xodimlari, qamoqxona nazoratchilari va sud ijrochilari, patent beruvchilar, sanoat inspektorlari va bosh vazirning shaxsiy kotiblari davlat fuqarolik xizmati deb ataladigan keng qamrovli tizimning amaldorlari ekanini bilib hayron boʻlishingiz mumkin. Davlat fuqarolik xizmatining kengayishi bilan uning kuchi ham oshib borishi shubhasiz.