Quyida keltirilgan ijtimoiy taʼlim vositalari zamonaviy oʻqituvchilar tomonidan pedagogik va “androgogik” maqsadlarda foydalaniladi. Har bir zamonaviy oʻqituvchi bilishi kerak boʻlgan 15 ta ijtimoiy taʼlim vositasi.

Ijtimoiy dastur va tarmoqlar zamonaviy oʻqituvchilar va ularning oʻquvchilari oʻrtasidagi munosabatni yaxshilaydi. Taʼkidlash joizki, ushbu vositalardan rasmiy va norasmiy oʻquv muhitida foydalanish orqali dinamik bilimlarni yetkazib beruvchi taʼlim hamjamiyatlarini qoʻllab-quvvatlash mumkin.

1. Edmodo

Edmodo oʻqituvchi va oʻrganuvchilar uchun aloqa bogʻlash va hamkorlik qilish, kontent va oʻquv dasturlari bilan almashish, shuningdek, uy vazifalari, baholar, guruh muhokamalari va bildirishnomalar uchun ishonchli joy boʻla oladi.

2. EduBlogs

EduBlogs osonlik bilan oʻrganuvchi va oʻqituvchilar bloglarini yaratish va boshqarishga yordam beradi, qisqa vaqtda dizaynlar yaratadi hamda video, fotosurat va podkastlarni oʻz ichiga oladi. Eng muhimi bu xavfsiz, sodda va ishonchli. Shunday ekan, Edublogʼni hoziroq sinab koʻring!

3. Elgg

Elgg mukofotlarga sazovor ochiq manbali ijtimoiy media vositasi boʻlib, universitet, maktab va kollejingizga talabalar uchun yaratilgan ijtimoiy tarmoq yordamida turli ijtimoiy muhitlarni yaratish yoki kompaniya va mijozlaringiz oʻrtasida aloqa oʻrnatuvchi vositalar yordamida ichki jamoaviy platforma yaratish uchun mustahkam poydevor taqdim etadi.

4. ePals

Birdamlik va loyihalarga asoslangan taʼlim uchun xavfsiz tarzda dunyo boʻylab guruhlararo bogʻlaning. ePals bu — mazmunli oʻqitish va oʻqishni targʻib qilish uchun yaratilgan platforma boʻlib, oʻqituvchi va oʻrganuvchilarga akademik yutuqlarga erishish uchun zarur boʻlgan taʼlimning asosiy tamoyillarini rivojlantirish uchun texnologiyadan qanday foydalanish kerakligini koʻrsatib beradi.

5. Google hamkorlik vositalari

Oʻrganuvchi, oʻqituvchi va jamoalarni birlashtiradi. Tez va oson hamkorlik faqatgina Google Appsʼga xos xususiyatdir.

6. Grockit

Grockit bu — moslashuvchan va shaxsiylashtirilgan oʻquv dasturi boʻlib, odamlarga tez oʻrganish va koʻplab savollarga toʻgʻri javob olish imkonini beruvchi noyob ijtimoiy taʼlim xususiyatlariga ega yordamchi ekani allaqachon foydalanuvchilar tomonidan tasdiqlangan.

7. MindMeister

MindMeister hamkorlikda qabul qilinadigan yechimlar orqali insonlarni birlashtiradi. MindMeister hamkorlikni yengillashtirish uchun noldan yaratilgan. Gʻoyalarni kerakli guruh va yoʻnalishlarga ajratib chiqish (mind mapping) hamda fikrlar jamlanmasini tashkil etish (brainstorming) boʻyicha yetakchi onlayn dastur hisoblanadi.

8. Ning

Insonlarni birlashtirish uchun mukammal ijtimoiy vebsayt yarating. Oʻz koʻrinishingiz, hissiyotlaringiz va ijtimoiy integratsiyani tanlang hamda jamoaga qoʻshiling.

9. OpenStudy

OpenStudy bu — oʻrganuvchilar savol berishi, boshqalarga yordam berishi va oʻzi kabi bilim olayotgan oʻrganuvchilar bilan muloqot qilishi mumkin boʻlgan ijtimoiy taʼlim tarmogʻidir.

10. Quora

Quora sizni oʻzingiz oʻrganishni istagan barcha maʼlumotlar bilan bogʻlaydi. Biror narsa haqida koʻproq bilishni istaganingizda, Quora siz bilan umumiy qiziqishi borlar, qolaversa, oʻsha mavzuda toʻla maʼlumotga ega boʻlgan mutaxassislarning javob va materiallari bilan taʼminlaydi.

11. Schoology

Schoology — darslarni boshqarish, oʻrganuvchilarni jalb qilish, kontent bilan boʻlishish va boshqa oʻqituvchilar bilan muloqot qilishning yaxshi usulidir.

12. Talkshoe

Sizga onlayn guruhlaringiz bilan bogʻlovchi hamjamiyat qoʻngʻiroq qilmoqda. Jonli shoularni yarating, rejalashtiring va boshqaring. Buni yozib olib va boshqalar bilan ham boʻlishing.

13. VoiceThread

VoiceThread bu — rasm, hujjat va videolar joylash mumkin boʻlgan va hamkorlikda yaratiladigan multimedia taqdimotlar toʻplami. Taqdimotlarni kuzatuvchilar koʻrib chiqishi va izohlarni 5 usulda — ovozli (mikrofon yoki telefon yordamida), matnli, audio fayllar yoki videolar orqali (veb-kamera yordamida) qoldirishi mumkin. Doʻstlaringiz, talaba va hamkasblaringiz ham oʻz izohlarini qoldirishi uchun ularga ham VoiceThreadʼni ulashish imkoniyati mavjud.

14. Wikispaces

Wiki jamoasi hamkorlikda bilim olish va maʼlumot almashishni osonlashtiradi. Negaki maʼlum huquqlarga ega boʻlgan har bir inson wikiʼga maʼlumot qoʻsha oladi. Siz ishlaringiz va gʻoyalaringizni, turli fotosurat, havola va video, shuningdek, boshqa turdagi media mahsulotlarni boʻlishishingiz mumkin.

15. Yammer

Yammer bu — kompaniyangiz uchun shaxsiy ijtimoiy tarmoq. Boʻlim, manzil, kontent va ​​biznes yoʻnalishidagi ilovalar oʻrtasida xavfsiz hamkorlikni yarating.

Maqola Khan Academy Oʻzbek loyihasi doirasida tarjima qilingan. Havola: Har bir zamonaviy o‘qituvchi bilishi kerak bo‘lgan ijtimoiy ta’lim vositalari.
Muqova surat: pexels.com